Radio ARA ass de fräien an
alternative Sender vu Lëtzebuerg. Eng Villzuel vu Bierger an
Associatioune maache bei eis Emissiounen.
Eise Programm
charakteriséiert sech duerch folgend Atout'en:
- Originell: et gëtt ëmmer eppes ze entdecken
- Speziell: d'Kombinatioun vu verschiddene Stiler
- Multikulti: verschidde Stëmmen a Sproochen, Musek vun hei a vum
aneren Enn vun der Welt.
Wéi et ugaang ass
Radio ARA krut am Joer 1992 eng
Lizenz fir d'Bedreiwe vun engem Sendernetz zu Lëtzebuerg.
Dëse Réseau ëmfaasst en Haaptsender an der Stad (kuck
hei) a
verschidde Relaissender uechter d'Land.
Radio RadAU, deen an der zweeter Halschent vun den 80er Joren an der Stad an am Süden vum Land als Pirat gesend huet, kann als ee vun de Motoren vun der Liberaliséierung vun de Radiowellen zu Lëtzebuerg ugesi ginn. Eng Rëtsch Leit vun deemools waren dobäi wéi de Projet Radio ARA gebuer gouf.
Evolutioun
Eise Programm war vun Ufank un
markéiert duerch eng staark Bedeelegung vun der internationaler
Communautéit vu Lëtzebuerg. Mee d'Ëmgestaltung vum
Moiesprogramm als engleschsproochegen Service am Joer 2000 ënnert
dem Numm "ARACityradio" war dach e bedeitende Schrëtt an der
Geschicht vum Radio.
2004 huet Graffiti, d'Associatioun
déi sech ëm d'Jugendemissiounen nomëttes këmmert,
eng Éducatrice graduée agestallt an domadder eng nei
Dynamik lancéiert. Heiduerch konnten déi jonk Reporter a
Musek-DJ'en professionell encadréiert ginn an och
d'Zesummenaarbecht mat aneren Associatiounen, Initiativen a
Jugendhaiser gouf verbessert.